Mánadagin blivu tveir bretskir tannáringadreingir, ið eru ávikavist 17 og 18 ár, tiknir í at hava stolið persónligar ognir, ið offur á Auschwitz áttu í sínari tíð. Hetta veit bretska The Independent at siga.
Sum útgangsstøði ljóða tingini, ið dreingirnir stjólu, ikki at hava nógv upp á seg. Talan var um nakrar saksar, ein partur av einari skeið og nøkur glaspetti.
Sambært einum umsjónarmanni á Auschwitz, sum í dag stendur eftir sum eitt fornminnissavn frá ræðuleikatíðini undir øðrum veraldarbardaga, har jødar blivu týndir í hópatali, so vistu dreingirnir als ikki av, hvussu álvarsligt tað var at stjala nakrar lutfalsliga týdningarleysar lutir, sum teir omanfyri nevndu.
Dreingirnir báðir sluppu avstað við einari bót áljóðandi 1800 krónur av tí orsøk, at teir ikki vistu reiðiliga um ræðuleikarnar, ið eru hendir á Auschwitz.
Hvørt ár vitja umleið hálvonnur millión fólk Auschwitz, ið var størsta týningarlegan av teimum øllum undir seinna heimsbardaga.
