U16 bólkin vann Sára Traber Olsen úr Tórshavn, sannførandi á Elubu M. Petersen av Viðareiði, men ungu kvinnurnar vístu báðar góðar taktir.
Sára Traber Olsen hevur áður vunnið FM og eisini luttikið í Norðurlandameisarakappng í talvi fyri gentur, og tað við góðum úrslitum. Hon verður eisini við til NM, sum verður í Íslandi í apríl mánaði.
U13 bólkurin gjørdist ein gysari av aðrari verð. Seks gentur vóru við í kappingini, men tær løgdu bragdliga fyri.
Eftir trimum umførum var Signhild Djurhuus úr Kollafirði á odda við fullum stigatali. Men í fjórða umfari tapti hon ímóti Honnu Jacobsen, somuleiðis úr Kollafirði, sum bert var eitt stig aftanfyri. Samstundis kom Kára Durhuus, eisini úr Kollafirði, ið tapti heldur óvæntað í fyrsta umfari móti óroyndu Onnu av Viðareiði við sjógv á bak móti toppinum. Seinasta umfarð lagaði tað seg soleiðis, at tríggjar lógu javnar í oddinum, og at tvær av teimum skuldu møtast. Kára møtti Signhild og har dróg Signhild longra stráðið.
Hin oddafiskurin Hanna Jacobsen vann á Tordis og tískil mátti umdystur til fyri at finna vinnaran.
Tvey talv á 10 minuttir vóru fyrst á skránni. Umdysturin byrjaði við at Hanna Jacobsen vann fyrra talvið við svørtum, men tapti seinna við hvítum. Tískil mátti enn ein dystur til, hesa ferð við tveimum talvum á fimm minuttir. Her vann Hanna Jacobsen bæði talvini og gjørdist FM vinnari í U13.
Kelda: Talvsamband Føroya
