Nú verða bert nøkur fá flogfør afturat avgreidd í gamla terminalinum í Vága Floghavn. Tí tá fyrsta flogfarið fer úr Vágum klokkan 8:15 týsmorgunin, verða ferðafólkini avgreidd gjøgnum nýggja terminalin, og so er tann gamli terminalurin søga.
Serligur hátíðardagur verður á flogvøllinum týsdagin.
– Vit lata upp týsmorgunin klokkan 7.00, og tey sum fara við flogfarinum til Keypmannahavnar kokkan 8.15 verða tey fyrstu ferðandi gjøgnum nýggja terminalin, sigur Jákup Sverri Kass, stjóri í Vága Floghavn.
– Ferðafólkini fáa okkurt serligt í samband við dagin, og tey fáa øll morgunmat frá Vága Floghavn, sigur hann.
Serligt tiltak verður, tá flogfarið úr Danmark kemur klokkan 13:45. Har fer Jóhan Dahl at klippa snórin, og hann og Kitty May Ellefsen, forkvinna í nevndini fyri Vága Floghavn, fara at halda røðu.
– Frá klokkan 14.30 til 16.30 er alment opið fyri øllum, har vit fara at vísa fram nýggju farstøðina og tænastubygningin. Okkurt gott verður til øll - og serliga børnini, sigur Jákup Sverri Kass.
Klokkan 19.00 verður veitsla fyri innbodnum í nýggju og gomlu farstøðini.
10 komur frá sjey ymsum býum og 9 fráferðir til fimm ymsar býir, eru eftir at avgreiða í gamla terminalinum, áðrenn tann nýggi verður tikin í nýtslu týsmorgunin klokkan sjey:
15 JUN 11:55 STOCKHOLM RC7361
15 JUN 15:45 BARCELONA RC491
15 JUN 21:40 COPENHAGEN RC459
15 JUN 22:55 COPENHAGEN RC461
16 JUN 08:45 GØTEBORG TF1245
16 JUN 12:30 LONDON RC411
16 JUN 13:50 COPENHAGEN RC453
16 JUN 14:20 BILLUND RC471
16 JUN 17:15 KEFLAVIK RC402
16 JUN 20:20 COPENHAGEN RC459
15 JUN 12:30 COPENHAGEN RC9362
15 JUN 12:30 COPENHAGEN RC452
15 JUN 16:35 COPENHAGEN RC456
16 JUN 07:00 LONDON RC410
16 JUN 08:15 COPENHAGEN RC450
16 JUN 09:30 BILLUND RC470
16 JUN 13:15 KEFLAVIK RC401
16 JUN 14:45 COPENHAGEN RC456
16 JUN 18:00 STAVANGER RC430
