Nú mugu vit rópa varskó, tí verða pengarnir fyrst spardir burtur, verður tungt at vinna tað inn aftur. Tað heldur Jónleif Johannesen, næstformaður í Føroya Lærarafelag.
Hann sigur við Skúlablaðið í morgun, at tað má vera eitt krav til politiska myndugleikan, at pengarnir, sum verða spardir við at leggja skúlar saman, skulu verða í skúlaskipanini.
Pengarnir skulu koma børnunum til góðar og samanleggingin skal ikki bara vera eitt sparingarátak hjá landsins myndugleikum, heldur hann.
Hann vísir á, at nógvar kommunur eru í ferð við at broyta skúlabygnaðun og í flestu førum er talan um at leggja skúlar saman.
Hann staðfestir, at hetta førir við sær, at tímar verða leysgivnir í skipanini.
- Men rópar eingin varskó, og ger greitt, at leysgivnu tímarnir skulu koma børnunum tilgóðar, er stórur vandi fyri, at teir verða spardir burtur og hvørva í stóru almennu sparingsætlanunum, sigur hann við Skúlablaðið.
- Krevja vit, ið eru tengd at fólkaskúlanum, ikki, at leysgivnu tímarnir verða brúktir innan skúlaskapin, missa vit ein gyltan møguleika á gólvið, leggur hann afturat.
Hann heldur, at tað hevði verið stórt spell, tí hesir tímar kunnu av álvara bøta um tey veiku liðini, sum fólkaskúlin hevur tørv á at styrkja.
Hesir tímar eru avgerandi fyri møguleikan hjá fólkaskúlanum at koma á norðurlendskt stig.
- Fella hesir tímar út úr fólkaskúlaskipanini, verður tað eitt drúgt tak at gera fólkaskúlan mennandi og avbjóðandi fyri tey, sum í dag ikki fáa nøktandi avbjóðngar, sigur Jónleif Johannesen.
Tí staðfestir hann, at foreldur, lærarar, og øll onnur í skúlaskipanini, eiga at krevja, at tímar, ið leypa av, tá ið skúlar verða lagdir saman, verða verandi innan skúlagátt.
|
