Tað er nú greitt, at tað verður stríðsval um formanssessin í Starvsmannafelagnum á aðalfundinum í mars.
Selma Ellingsgaard leggur frá sær eftir at hava verið forkvinna í átta ár, og nú er greitt, at tveir mans fara at kappast um formanssessin, boðar felagið frá í kvøld.
Talan er um Niels á Reynatúgvu og Súna Selfoss, sum báðir hava sitið í nevndini í Starvsmannafelagnum í fleiri ár. Tá freistin at stilla upp valevni til formansvalið var úti á miðnátt, vóru tvey uppskot komin inn til nýggjan formann.
Teir báðir, sum eru í uppskoti at verða nýggjur formaður í Starvsmannafelagnum, hava fleiri ára royndir í fakfelagsarbeiði.
Súni Selfoss er 51 ára gamal og er savnsvørður í Kringvarpi Føroya. Hann sørvingur og har býr hann eisini. Hann hevur sitið í nevndini í Starvsmannafelagnum tíðarskeiðið 2000 til 2006 og aftur frá 2007 til dagin í dag. Síðani 2008 hevur hann verið næstformaður í felagnum.
Niels á Reynatúgvu er 40 ára gamal og er tøknifrøðingur hjá FT Neti í Føroya Tele. Hann er av Sandi, men býr á Signabø. Hann hevur sitið í nevndini hjá Starvsmannafelagnum síðani 2006.
Formaðurin í Starvsmannafelagnum verður valdur fyri fýra ár í senn. Formansvalið er á aðalfundinum 5. mars, sum hesaferð verður hildin í Norðurlandahúsinum.
