Havlívfrøðingar mæla til, at í mesta lagi 115.000 tons av rækjum kunnu fiskast í Vesturgrønlandi í 2022, og 3000 tons í Eysturgrønlandi.
Hetta er júst sama ráðgeving, sum hevur verið galdandi fyri árið í ár, bæði í Vesturgrønlandi og Eysturgrønlandi.
Tilmælini eru latin grønlendska landsstýrinum, sum fer at seta endaligu tølini á, hvussu nógv tons av rækjum kunnu fiskast í Grønlandi í 2022.
Sermitsiaq veit at siga, at lívfrøðiligar royndir eru ikki gjørdar av rækjustovninum í Grønlandi í ár, tí nú verður bíðað eftir nýggja havrannsóknarskipinum, sum er seinkað.
Útrokningar hjá havlívfrøðingum vísa tó, at rækjustovnurin í Vesturgrønlandi verður veiddur burðardygt, og at stovnurin bæði er støðugur og stórur.
Stovnurin verður eisini mettur út frá rækjuveiðini í árinum og veiðini fyri hvørt tóv, sum skipini á rækjuveiði gera. Ymisk onnur atlit eru eisini tikin í metingunum.
Sum skilst, vísa metingar eisini, at rækjustovnurin í Eysturgrønlandi hevur verið í menning seinnu árini.
- Men, stovnurin her er ikki á sama støði sum fyri 2004. Haraftrat kemur, at rækjurnar í Eysturgrønlandi eru savnaðar í einum avmarkaðum øki á leiðini við Dorhn Banka, skrivar Sermitsiaq.
