Forsetin í Ukraina, Volodymyr Zelenskyj, sigur, at herurin í landinum tekur seg longur og longur eystur yvir í økjum, har russisku herdeildirnar eru flýddar.
- Tað er týðiligt, at hersetingarvaldið er í panikki, segði forsetin í sínari dagligu video-talu til ukrainska fólkið í gjárkvøldið.
Sambært Reuters sigur forsetin eisini, at tað ræður um hjá ukrainsku herdeildunum at gera skjótt av og fara inn í økini, har russiski herurin er flýddur.
Volodymyr Zelenskyj sigur, at tað ræður um skjótleika í framtøkunum, og skjótleika í at endurskapa eitt vanligt lív aftur í økjunum.
Í sínari video-røðu nam forsetin eisini við, hvat hann fer at siga í sínari video-talu á ST-aðalfundinum mikudagin.
Her nevndi hann, at hann í sínari røðu fer at mæla til fleiri vápnaveitingar í stríðnum móti russiska hersetingarvaldinum og aðra hjálp til Ukraina.
