Nógv virksemi er á Dungasandi í Sørvági hesum døgum, har bæði umbyggingar og útbyggingar fara fram.
- Arbeiðið byrjaði í vár, men steðgaði upp næstan beinanvegin, tá friðingarmyndugleikin setti ein fyribils steðg í, men nú er tann knúturin endaliga loystur, og øll loyvi eru fingin uppá pláss.
Tað siga tey í Sørvágs kommunu.
- Fótbólturin í Vágum er í rívandi menning, og bæði menn og kvinnur eru við í fremstu røð. Menninir fingu í ár sítt besta úrslit nakrantíð, og endaðu nummar fimm við 40 stigum.
Víst verður á, at hetta eru 11 stig fleiri enn í fjør. 07 Vestur var eisini í hálvfinaluni um Løgmanssteypið í ár, har liðið tapti móti HB.
- Ungdómurin gjørdi eisini fleiri góð hál í kappingarárinum, og U21-liðið hjá monnum gjørdust føroyameistari. Eisini fingu fleiri av okkara ungdómsleikarum landsliðsboð, bæði hjá gentum og dreingjum.
Í Vágum staðfesta tey, at hetta ber boð um eina bjarta framtíð hjá felagnum.
Men, fyri at spæla í bestu deildini, so fylgja eisini nógv krøv til kringumstøðurnar. Eitt av hesum krøvum er, at áskoðarar skulu kunna sita undir taki, og hetta skal verða í seinasta lagi í 2024.
- Eisini er eitt fjølmiðlarúm eitt krav. Fjølmiðlarúmið er nú innilokað, og tað er Egil Petersen, sum hevur staðið fyri timburarbeiðnum. Hetta er gjørt í framhaldi frá O7 Vestur-húsinum og heimeftir.
Teir, sum stóðu fyri stoypiarbeiðnum, vóru arbeiðsmenn hjá Gutta Guttesen í Bø.
- Niðara hæddin verður eitt goymslurúm til mál og aðra útgerð. Vegurin framvið Kirkjuánni til 07 Vestur-húsið er nú blivin asfalteraður í vikuni, og tað eru arbeiðsfólk hjá Vága Asfalt, sum hava gjørt hetta.
Í Sørvágs kommunu vísa tey á, at hinumegin 07 Vestur-húsið og ímóti Stórá skal skýlið byggjast, sum fer at rúma 480 áskoðarum og verður yvir 4. hæddir.
- Skýlið er projekterað við støði í L-elementunum frá gamla Tórsvølli. Skýlið er projekterað so lágt sum gjørligt við atliti til grannarnar. Klæðingin verður ein opin alu-klæðing, so skýlið verður transparent, sum tað verður rópt, at síggja til frá Niðaravegi, verður lagt aftrat.
##med2##
