Fimm trolarapør eru til fiskiskap eftir upsa, og eitt par er framvegis á gulllaksaveiði.
Á Fiskamarknaði Føroya siga tey, at fiskiskapurin eftir upsa er góður, og tað hevur hann verið í eina tíð.
Av djúpvatnstrolarunum er ein á Íslandsrygginum, og ein er eystanfyri. Væntandi koma báðir trolararnir inn at landa í vikuni sum kemur.
Sagt verður, at djúpvatnstrolararnir fáa mest av toski og upsa og eitt sindur av svartkalva og blálongu.
Havrannsóknarskipið Jákup Sverri ger yvirlitstrolingar og fær mest av hvítfiski.
- Tríggir trolbátar eru úti. Teir fáa mest av toski og hýsu og so nakað av flatfiski. Væntandi koma allir trolbátarnir inn at landa í vikuni sum kemur.
Trý garnaskip fiska svartkalva.
- Garnaskipini hava góðan fiskiskap, og væntandi koma øll inn at landa ein av komandi døgunum, siga tey á Fiskamarknaði Føroya.
