Teir fýra blóðblettirnir stava sambært enska blaðnum Daily Mirror frá einum evropeiskum manni, sum hevur búð í sama kamari. Íbúðin, sum kamarið er partur av, er leigað út fleiri ferðir, síðani Madeleine McCann hvarv tann 3. mai, og maðurin leigaði íbúðina eitt tíðarskeið í summar, skrivar blaðið.
Portugisiska løgreglan er kortini sannførd um, at tann fýra ára gamla gentan er deyð.
- Vit hava fleiri upplýsingar at halda okkum til, sigur talsmaðurin hjá løgregluni, Olegario Sousa, við Daily Mirror.
Foreldrini hjá Madeleine halda harafturímóti uppá, at gentan er á lívi, og tey hava higartil sýtt fyri at fara úr Portugal. Mamman, Kate McCann, sigur kortini við Daily Mirror, at tey hava ongan hug at fara aftur til Bretlands, fyrr enn Madeleine er funnin, men at tey noyðast eisini at hugsa um hini børnini.
- Men eg dugi ikki at ímynda mær, at vit komu higar sum fimm og skulu heim aftur sum fýra, sigur Kate McCann við Daily Mirror.
