Fiskastovnar
Yvirlitstrolingarnar, sum Magnus Heinason hevur gjørt á Føroyabanka í heyst, vísa týðiliga, at lítil fiskur er á Bankanum. Fiskurin er sum heild lítil í tali, og toskurin er væl smærri, enn hann plagdi at vera.
Eyðfinn Magnussen, biologur, sum starvast á Náttúruvísindadeildini hjá Fróðskaparsetri Føroya, sigur, at á 29 trolstøðum fingu teir bert einar 10-15 toskar í hvørjum háli.
- Hesi tóvini vardu í umleið ein tíma hvørt, so hetta er rættiliga lítil veiða, ásannar biologurin.
Hann vísir á, at tað, sum fæst á Føroyabanka í dag, er fiskur, sum er eini 2-3 ára gamal, og tí er fiskiskapurin í dag tengdur at tí, sum kom undan hesi árini.
Spurdur, um hann dugir at siga, hví so lítil fiskur er á Føroyabanka í dag, nú tað annars vísir seg, at fiskurin sum heild er í góðum holdum, sigur biologurin:
- Tað er sjálvandi torført at siga, men fiskifrøðingar hava leingið ávarað um, at veiðan á Bankanum hevur verið ov stór seinastu árini.
Hann vísir á, at tað, sum er at fáa á Føroyabanka í dag, er eitt úrslit av tí, sum kom undan fyri 2-3 árum síðan og teirri roynd, sum hevur verið síðan. Aftrat hesum spæla so náttúruviðurskiftini sjálvsagt eisini inn.
Biologurin vísir á, at fiskurin saktans kann vera í góðum holdum, hóast veiðan er lítil.
- Er lítil fiskur, er meira av føði í part til hvønn fiskin, sigur hann.
Eyðfinn Magnussen sigur, at fyri nøkrum árum síðan var toskurin á Bankanum í miðal einar 90 cm. til longdar, og vektin fyri hvønn fiskin lá um 10 kilo.
- Toskurin, sum vit fingu undir yvirlitstrolingunum hesaferð, lá millum 50 og 60 cm. til longdar, sigur biologurin.
Í fyrru helvt av nítiárunum var Føroyabanki friðaður fyri allari veiði, men síðan hevur Bankin verið opin aftur fyri húkaveiði.
Nú bendir so alt á, at støðan toskinum á Bankanum er verri, enn hon hevur verið í fleiri ár.
