Jackie Zachhau hevur verið havnarmeistari og vatnmeistari í Nes kommunu síðan á heysti 2015. Hetta er eitt flættað starv, har hann hevur ábyrgdina av havnalagnum og tí skrivstovuarbeiði og øðrum, sum hongur uppi í hesum, og síðan hevur hann eisini ábyrgdina av vatnverkinum.
- Vit fegnast um, at meira hevur verið at gera á havnarlagnum, síðan landingarmiðstøðin læt uppaftur, eftir at virksemið hevði ligið stilt í eina tíð. Vit merkja væl, at fleiri skip koma til bygdar við fiski, bæði línuskip, trolarar við gulllaksi og garnaskip.
Havnarmeistarin vísir á, at línubátarnir javnan eru á Toftum, eins og garnabáturin, Oknin, burtur av leggur veiðina upp her. Eysturbúgvin og Vesturbúgvin, sum nú aftur eru á gulllaksaveiði, leggja eisini fiskin upp á Toftum.
Jackie Zachhau sigur, at umframt at landingarmiðstøð nú er í bygninginum, har Valhalla áður helt til, hevur Sandgrevstur eisini goymslu við alifóðuri í einum vinnubygningi á havnalagnum. Fóðurið verður partvís heintað við bilum, og í aðrar mátar fer tað umborð á bátar, sum flyta fóðurið út til alistøðirnar.
Afturvendandi er eisini, sigur Jackie Zachhau, havnar-og vatnmeistari, at farmaskip javnan og nakrar ferðir um árið kemur á Toftir við salti til M.J.Saltsølu, sum er Inni á Rætt. Í dag er lítil útróður í mun til, tá útróðurin var mestur, men landingarmiðstøðin á Toftum landar eisini útróðrarbátar.
