Tað er langt millum sigrarnar

Eftir at hava verið undir trýsti so at siga alt kappingarárið, so er møguleiki hjá KÍ í morgin at taka risafet móti bjargingini, um tað fyri fyrstu ferð í ár eydn­ast at vinna fulla úrtøku í tveim­um heimadystum á rað.
Tá ið KÍ seinnapartin í morgin fær vitjan av B68, so verð­ur tað 11. ferðin í ár, at KÍ eigur heimavøll, og higartil hev­ur tað bara eydnast at vinna tríggjar ferðir. Fyrsti sigur­in var, tá ið B68 vitjaði í 2. um­fari, og úrslitið var 3-1.
Tað er tunnilsdagur og har­við verður tað frítt at koyra í morgin. Ofta hevur tað víst seg, at heimaliðið stendur seg illa, tá ið okkurt serligt er á skránni í Klaksvík. KÍ spældi við yvirskoti og sjálvsáliti sunnu­dagin, tá ið NSÍ varð sent til hús við 5-1 tapi, og álops­bogin hjá KÍ verður eisini spent­ur í morgin.
– Móti NSÍ hilnaðist tað væl, tá ið vit ongantíð góvu teim­um frið, men fóru alla tíðina eftir teimum, um tað so var aftarlaga hjá teimum, og vit fara at royna sama konseptið ímóti B68, verður sagt úr KÍ leguni.
Einasta broyting hjá KÍ er, at Sørmundur Kalsø er við aftur í miðverjuni eftir leikbann.
B68 hevur 26, og KÍ hevur 25 stig, og full úrtøka letur vinnaranum upp stórar møgu­leikar longu nú at tryggja sær sessin í fremstu røð.
– Vit vóru tiknir av bóli, tá ið KÍ í 2. umfari var rættuliga ágangandi og vann 3-1. Nú eru vit betri fyrireikaðir upp á ta støðuna, men vit hava sjálvandi stóra virðing fyri teimum bláu, sigur Bill Jacobsen, sum er upp­vaksin í KÍ og tískil kennir væl til KÍ og menningina har.
Sum vit søgdu mikudagin, so verða fleiri teirra, sum fyrr í summar mannaðu fremstu B68 plássini, ikki við í morg­in, tá ið B68 álopið verður mann­að av nýggjum. Umframt Keita og Camara, sum eru skadd­ir og Óla Olsen, sum er burtur­staddur, so er eisini mið­vall­arin Remi Langgaard burtur­staddur. André Olsen er tøkur aftur eftir leikbann. Kristian Anton Andreasen og ung­linga­spælararnir Haraldur R. Kjeld og Bjarki Johannesen eru møguligir álopsspælarar sam­an við brøðrunum Jónleif og Dánjal Paula Højgaard, sum báð­ir eru sera skjótir og hava mann­að høgra borð higartil í ár.