Í Danmark eru tey í dag í ferð við at skera upp ein strandaðan avgust í Norðurjyllandi.
Av ótta fyri, at hvalurin kunndi spreingjast, og tí at deymurin var øgiligur, so varð hvalurin fluttur nakrar kilimetrar eftir strondini, áðrenn hann varð skorin upp.
Hetta fær okkum at hugsa um hendingina, tá Bjarni Mikkelsen, lívfrøðingur, skar avgustin upp við Áir í noevmber í 2013. Tá sprongdist hvalurin. Hendingin varð tikin upp á film, sum fór víða um lond.
Við endurprenta her grein av in.fo frá 25. november í 2013 og viðhefta video av Youtube, tá hvalurin sprongdist:
Hava ongantíð sæð land
Avgustarnir, sum seinastu dagarnir hava svomið í Sundalagnum, har tveir teirra higartil eru deyðir, hava valla áður sæð land
– Teir eru vanir at svimja í vektloysi á opnum djúpum havi, og tí hava teir stórar trupulleikar, tá teir koma nær landi og gera landgongd, sigur Bjarni Mikkelsen, lívfrøðingur á Náttúrugripasavninum, sum seinastu dagarnar hevur brúkt nógva tíð í Sundalagnum, og sum eisini var á staðnum í seinnapartin sunnudagin.
##med2##
Sosialurin hitti í gjár Bjarna Mikkelsen í fjøruni við Norðskála beint norðan fyri brúnna um Streymin. Har lá avgusturin, sum doyði í gjár. Hann hevur ligið hinum megin sundið seinastu dagarnar, í Nesvík, har ein annar avgustur eisini lá deyður.
– Klokkan hálvgum sjey sunnumorgunin var hann á lívi hinumegin. Hann hevur síðani svomið yvirum, og er deyður einaferð fyrr í dag, segði Bjarni Mikkelsen í gjár.
Hin avgusturin lá sunnudagin á Oyri sunnan fyri Brúnna. Hann er flotnaður, eftir at hava ligið deyður í Nesvík Streymoyarmegin seinastu dagarnar.
– Hann er óivað flotnaður, tá bruni er komin í hann, og hann er vorðin lættari í sjónum, sigur Bjarni Mikkelsen.
Ætlanin hjá Náttúrugripasavninum er at taka báðar hesar avgustarnar upp á hvalastøðina við Áir. Tað er kanska lagnunnar speisemi, at hesi avgustar hava lagt beinini beint við einastu hvalastøð norðan fyri Ekvator. Men ætlanin er so at goyma beinagrindina av avgustinum, sum liggur norðan fyri Streymin, tí tann hvalurin er heilur enn. Hin hvalurin, sum liggur sunnanfyri, er tann, har onkur hevur sagað undirkaftin av.
– Men vit ætla kortini at taka hann upp fyri at hyggja í kýkin at vita, hvat hann hevur etið, sigur Bjarni Mikkelsen.
Bjarni Mikkelsen hevur mált avgustin, sum liggur í fjøruni við Norðskála. Hann máldi hann til slakar 14 metrar, og hann metir, at hann vigar um 20 tons.
– Hesin er ikki fullvaksin, sigur Bjarni Mikkelsen, sum samstundis staðfestir, at hesir hvalir ikki eru komnir higar fyri at doyggja av elli.
– Teir eru uttan iva vilstir higar millum oyggjarnar. Teir eru jú vanir við at liva í vektloysi á djúpum havi og hava valla sæð land áður. Tá teir so koma millum oyggjar og á grunt vatn, so eru teir púra fyri ongum, sigur Bjarni Mikkelsen.
Bjarni Mikkelsen sigur, at avgustur als ikki veit, hvussu hann skal gera, tá hann er nær landi.
– Øðrvísi er við bóghvítuhvali, sum dugir væl at fara upp á land og koma á sjógv aftur, og hann er vanur at ferðast, har nógv fólk er.
