Hvussu kann ein landsstýrismaður – um enn nakað politiskt feskur – siga, at einki argument er fyri at gera ein sandoyartunnil nú ??? Sær ein búskaparfrøðingur ikki, at menningin í/av Føroyum er brotin av um Skopunarfjørð?
Útviklingur og menning – og búskaparlig upphiting fer fram norðan fyri Skopunarfjørð við miklari ferð, meðan Sandoyggin og Suðuroyggin leingi hava staðið í stað og eru sigldar afturút, tí fyritreytirnar eru í og um Tórshavn.
Tað er alneyðugt at fáa bæði Sandoynna, síðan Suðuroynna og upp á longri sikt eisini tær minnu oyggjarnar samanbundnar við tunlum. Tað er ov kostnaðarmikið at sigla millum oyggjarnar, og heldur ikki nøktandi farvegur í framtíðini.
Hetta er størsta fyritreytin fyri framburði og vælstandi í øllum Føroyum. Vælferð er ikki at flyta okkum øll til Tórshavnar, men Tórshavn er høvuðsstaður okkara og miðstøða Føroya fólk. Og tað eigur Havnin at liva upp til.
Tað var tann tíð, tá bygdirnar og oyggjarnar føddu Havnina. Men í dag kemur allur peningur úr Tórshavn, og har fellur mest niður fyrst.
Og verða Føroyar eitt valdømi, so fáa vit uppaftur meira miðstaðar-lokalpolitikk, tað prógvar júst hendan umrøðan um raðfesting av íløgum fyri okkum.
Í skjótt fýra ár hevur staðið í samgonguskjalinum hjá Føroya landsstýri, at í ár 2007 skal verkslógin fyri sandoyartunnilin viðtakast – fyri at byrja verkið í ár 2008. Forkanningar eru gjørdar.
Hetta eigur at liggja fast, um nakað álit skal vera á politiska lívið í Føroyum frameftir, og ein nýggjur landsstýrismaður kann ikki einsamallur broyta hetta.
Sandoyartunnilin er alneyðugur nú.
