Fleiri góðynski vórðu send Tórshavnar Golfklubba, tá klubbin seinnapartin í dag helt eitt lítið hátíðarhald í sambandi við, at flagið frá Tórsvølli, ið varð flutt út á Glyvursnes í summar, varð tikið í brúk til golfspæl.
Flagið verður partvíst brúkt til at spæla á, og partvíst brúkt til tann partin av vøllinum, ið verður brúktur til at venja seg við golfsløgum.
- Veðrið var av tí fagrasta, og Havnin vísti seg frá sínum allar vakrasta vinkli, tá Heðin Mortensen borgarstjóri tók fyrsta golfslagið út á nýlagda teigin við grøna grasinum av Tórsvølli, sigur golffólkið í Havn
Í Tórshavnar kommunu verður nú ásannað, at tørvur er á eini rættiligari golfbreyt í Føroyum, og tí hevur býráðið lovað bæði golfklubbanum og Ítróttasambandinum at vera við til at tryggja, at ein nýggj 18-teiga breyt verður klár, so at oyggjaleikir aftur kunnu koma til Føroya í 2019.
- Okkara partur skal i hvussu so er ikki liggja eftir, segði Heðin Mortensen á Glyvursnesi.
Formaður golfklubbans, Jógvan Amonson, hevði eisini eitt annað ynski, umframt at fáa til vega ein rættiligan golfvøll. Nevniliga, at vegurin á Glyvursnes verður bøttur, so at koyrandi er út í hetta nátturuvakra økið uttan at oyðileggja akførini.
Eftir túrin út á Glyvursnes, skilti borgarstjórin ynskið um at fáa bøtt vegin, og Heðin Mortensen lovaði eisini at fáa hetta gjørt fyrsta dagin.
Í morgin, leygardagin, er golfbreytin á Glyvursnesi opin fyri almenninginum. Har verður høvi hjá fólki at royna seg í golfspælinum. Limir í golfklubbanum standa til reiðar at leggja fólki lag á.
Á myndini, har tríggir mans standa, eru teir , f.v., Petur Elias Petersen, ÍSF-forseti, Heðin Mortensen, borgarstjóri, og Jógvan Amonson, formaður í Tórshavnar Golfklubba
