Tórshavnar Býráð súltar musikkskúlan

Hugskotið at byggja nýggjan musikk­s­kúla í Havn hevur røtur langt aftur í tíðina. Verkætlanin hevur verið á skrá til fleiri býráðsval, og flestu politikkarar hava sagt seg vilja arbeiða fyri verk­ætlanini - í hvussu er í val­stríðnum.
Tað vísir seg hóast hetta at vera sera trupult at fáa verkætlanina við nýggjum musikkskúla førda út í lívið.
Í løtuni liggur eitt liðugt uppskot klárt á Vaglinum, eitt uppskot, sum er lagt til rættis niður í minsta smá­lut - men einki hendir. Til ber ikki at fáa samband við av­varðandi politikkarar ella umsiting Tórshavnar Bý­ráðs, hvørki tá viðvíkur kunn­ing ella ynski um fund um málið.
Hettar er ein ørkymlandi støða at vera í! At Býráðið og umsiting tess ikki vilja sam­skifta og kunna um eitt so stórt og týdningarmikið mál er ikki sørt ófrættakent.
Spurningurin er so, um Tórs­havnar Býráð í heila tikið ynskir at føra verkætlanina við nýggjum musikkskúla í høvuðsstaðnum út í lívið? Ella bara brúkar hettar so framskygda mál til egnan fyrimun - at sóla sær í?
Í fleiri førum hava býráðs­politikkarar lovað, at nýggi musikk­skúlin skuldi standa klárur innan fá ár. Harafturat hava fleiri framløgur verið, sum býráðspolitikkarar hava staðið á odda fyri, og sum hava víst á, hvussu ar­beið­ið skal gerast, og hvør tíðar­ætla­n­in er.
Nógvur peningur – skatta­borgarans peningur – er longu brúkt­ur til verkætlanina, og har­­afturat tíð og orka hjá musik­k­skúlanum sjálvum, arki­tek­tu­m, fylgibólki, musikk­­skúl­anevnd og um­sit­ing Tórshavnar Býráðs.
At einki hendir er ein van­virð­ing av teimum, sum undir sera vánaligum umstøðum royna at gera eitt dygdar arbeiði við at geva komandi ættar­liðum gott í beinið.
Tórshavnar Musikkskúli gongur undan á so nógv­um økjum, men hevur veru­liga tørv á nýggjum og framkomnum hølum til virk­semið. At Býráðið ikki sær álvaran í hesi støðu, men ístað­in súltar verkætlanina um bygging av nýggjum musikk­skúla er at lata salt í sár­ið hjá teimum, sum vilja musikk­skúlanum væl.
Musikkskúlanevnd Tórs­havnar Býráðs hevur sum aðalmál at arbeiða fyri musikkskúlanum í breiðari merk­ing. Nevndin hevur staði­liga roynt at fáa fund við Býráðið um málið, men einki frættist av Vaglinum - tøgn­in valdar!
Spurningurin er, um Tórshavnar Býráð veru­liga ynskir ein nýggj­an musikk­skúla, ella um væl­vilj­in fyri musikk­­skúlanum bara er ein glæntri­leikur og eitt gylt høvi hjá býráðslimum at bregg­ja sær av 4. hvørt ár ?
Musikkskúlanevndin, sum Tórs­havn­ar bý­ráð hev­ur valt, er ør­kyml­að og ynsk­ir at fáa greitt at vita, hvør støð­an er, og hvar mál­ið liggur.
Nú er nokk bíðað, nú má okk­urt henda !