Jørgen Niclassen, landsstýrismaður í fiskivinnumálum, skal mikudagin svara fráboðaðum munnligum spurnigi frá Tórbirni Jacobsen, tingmanni, um umsiting fiskimálastýrisins av tunfiksloyvum.
Fyrispurningurin er settur saman av fimm spurningum, og spyr Tórbjørn Jacobsen:
? Hvussu nógv tunfiskaloyvi eru givin. Nær og til hvønn?
? Undir hvørjum treytum eru tunfiskaloyvini latin? Og um ymsar treytir eru settar loyvishavarunum, verður biðið um eina nærri grundgeving fyri hesum.
? Í hvønn mun hevur Fiskimálastýrið tryggjað sær, at loyvishavararnir sjávir eru mentir at gagnnýta hesi loyvi?
? Um loyvishavararnir ikki hava førleika til sjálvir at gagnnýta hesi loyvi, hvørji tiltøk hevur ? ella ætlar ? Fiskimálastýrið at seta í verk til tess at tryggja almenn áhugamál í hesum sambandi?
? Hvussu ætlar Fiskimálastýrið at umsita slík loyvi í framtíðini? Er ætlanin at broyta mannagongd, verður biðið um eina frágreiðing um ætlaðu broytingarnar og við hvørjari grundgeving hesar verða settar í verk.
Herfyri kom fram, at tað ber til at vinna pening burturúr at eiga tunfiskaloyvi, hóast tú ikki eigur skip, við at leiga tunfiskaloyvið út.
