Runavíkar býráð hevur sett Tórbjørn Jacobsen sum havnarmeistara í Runavíkar havn. Á fundi í gjárkvøldið samtykti Runavíkar býráð at seta Tórbjørn Jacobsen á Glyvrum í starv sum havnarmeistari í Runavíkar havn.
Umframt havnalagið í Runavík fevnir havnaøkið Glyvrar, Søldarfjørð, Skála, Oyndarfjørð og Funningsfjørð. Harafturat eru eisini fleiri smærri lendingar og bátahyljar í kommununi.
Afturat havnarmeistaranum eru tveir havnarumsjónarmenn í starvi, skrivar heimasíðan hjá Runavíkar kommunu, runavik.fo.
Tórbjørn Jacobsen, sum er 54 ára gamalur, er útbúgvin skipsførari. Hann hevur í mong ár siglt sum skipari.
Síðani 1998 hevur hann verið uppi í politikki sum løgtingsmaður, landsstýrismaður og fólkatingsmaður.
