Tór-Ingar Akselsen gjørdi í vetur avtalu við nýggja samansetta felagið 07 Vestu. Eitt umsitingarligt mistak bar tó við sær, at spæliloyvið hjá spælaranum ongan tíð varð flutt úr HB.
Reglurnar hjá Fótbóltssambandinum staðfesta, at flytingarvindeygað læt aftur tann 22. februar, men ein ventilur er tó, at Kappingarnevndin kann loyva frávikum undir heilt serligum umstøðum.
Og 07 Vestur fekk viðhald í, at talan var um heilt serligar umstøður.
- Grundgevingarnar eru, at leikarasáttmálin er innsendur í november 2007 í upprunaliga felagnum, og í januar 2008 í samanlagda felagnum. Misskiljing millum feløgini var orsøkin til, at umbønin um flytan av leikaraloyvi ikki var innsend rættstundis, skrivar FSF á heimasíðu sínari.
Formaður í Kappingarnevndini er Sveinur Tróndarson. Hann ásannar, at hetta kann eggja øðrum feløgum, sum møguliga hava ein spælara á hondini, at søkja um undantaksloyvi. Men hann heldur samstundis, at úrskurðurin hesa ferð er rættiliga greiður.
- Tað er jú einki sum helst, sum hevur verið krógvað í hesum málinum. Longu í fjør heyst varð boðað frá, at spælarin skifti felag. Í skiftinum frá FSV04 til 07 Vestur fall júst hetta spæliloyvið tó imillum av misgávum. Men har eingin, sum hevur ivast í, hvar spælarin skuldi. FSF hevur góðkent tveir sáttmálar upp á spælaran, og talan er ikki um nakra ósemju av nøkrum slag millum HB og 07 Vestur.
- Tí kann hetta ikki sammetast við eina støðu, har eitt annað felag brádliga kemur við einum øðrum spælara, sum teir nú vilja hava góðkendan. Vit fingu eisini eina løgfrøðiliga meting av málinum, áðrenn vit gjørdu endaliga úrskurðin, og tann metingin stuðlar eisini avgerðini, sigur Sveinur Tróndarsson.
