Liverpool hevur keypt 22 ára gamla Dominik Szoboszlai frá RB Leipzig. Altjóða miðlar skriva, at prísurin er um 525 milliónir krónur. Felagið kunngjørdi keypið í gjár.
22 ára gamli miðvallarin er úr Ungarn og er ein partur av ættarliðsskiftinum hjá Jurgen Klopp í Liverpool. Undan honum kom heimsmeistarin, Alexis Mac Allister, frá Brighton. Út eru farnir Roberto Firmino, Alex Oxlade-Chamberlain, James Milner og Naby Keita.
Tann síðstnevndi spældi við 8-talinum, sum tey flestu seta í samband við legenduna í Liverpool, Steven Gerrard. Tað tykist verða ein semja um, at Naby Keita ikki livid upp til 8-talið, og nú hevur ein nýggjur maður møguleikan at lyfta arvin.
Dominik Szoboszlai verður væntandi ikki seinasta keypið hjá Liverpool í summar. Søgurnar seta Liverpool í samband við 19 ára gamla Romeo Lavia hjá Southampton, 22 ára gamla Khépren Thuram hjá Nice og 22 ára gamla Mano Koné hjá týska Borussia Mönchengladbach.
