Songkvinnan Taylor Swift hevur fatur í rætta endanum í øllum førum tá ið tað kemur til at selja tónleikin.
22 ára gamla songkvinnan, sum byrjaði sum countrysongkvinna, men hevur flutt seg nakað meira yvir í popp, er í hesum døgum at finna ovarliga alheims hitlistum, og sangirnir hjá henni selja sum heitt breyð.
Fjórða fløgan hjá Taylor Swift, sum kallast Red, kom út 22. oktober, og fyrstu vikuna seldi hon 1,2 milliónir eintøk í USA. Tann sølan tekur metið, sum Eminem annars hevur havt síðani 2002.
Taylor Swift er eisini fyrsta songkvinnan, sum tvær ferðir hevur selt meira enn eina millión eintøk í fyrstu vikuni, eftir at hon hevur givið fløgu út.
Útgávan Red kom beina leið inn á ovasta plássið á hitlistanum hjá Billboard, og fyrstu vikuna seldi Red meira enn enn hinar topp-50 útgávurnar samanlagt. Í farnu viku stóð Red fyri næstan 20 prosentum av allari fløgusøluni í USA.
