Fyri kortum gav bólkurin út staklagið Tórshavn, og nú lokka Swangah av nýggjum. Í dag hava teir nevniliga umvegis Facebook-síðu sína kunngjørt, at teir hava lagt eitt nýtt lag á YouTube. Lagið ber heitið Øll í mínum sikti, har vit hoyra Steen Róa Lorenzen høgga til høgru og vinstru til ymsar aktørar á føroyska tónleikapallinum.
»Ikki taka tað persónligt. Hetta er ikki meint persónligt. Men um tað ljóðar persónligt, so tekur tú tað persónligt«. Soleiðis byrjar Øll í mínum sikti, har Swangah eisini hava fingið hjálp frá diskaranum DJ Drastic.
Hetta er næsta staklagið av komandi fløguni, Undirgangstónar, sum kemur út í summar. Fyrsta fløgan, Belials synir, var ógvuliga væl móttikin og vann bólkurin heitið sum Ársins bólkur og Ársins nýggi bólkur á Planet Awards 2011.
Á leinkjunum niðanfyri ber til at hoyra nýggja staklagið Øll í mínum sikti, og fyrsta staklagið Tórshavn, sum kom úr fyri einum mánaði síðani.
Mynd: Skermprent av Øll í mínum sikti á YouTube
