Svimjing
Tey árini, sum Føroyar hava tikið lut á Oyggjaleikum, hava føroysku svimjararnir altíð talst millum teirra, sum hava gjørt mest vart við seg.
Heiðursmerkini hesi árini hava verið nógv í tali, men nú er kanska líkt til, at ein minking av heiðursmerkjatalinum er ávegis.
Breiddin ov lítil
Ikki tí. Millum luttakararnir á komandi oyggjaleikunum eru fleiri, sum áður hava vunnið nógv, og sum vónandi eisini fara at gera tað hesaferð, men hinvegin skerst ikki burtur, at breiddin í føroyskari svimjing er minkað munandi seinnu árini.
Hetta er eisini nakað, sum nýggi landsliðsvenjarin, Petur Heðin á Fløtti, segði, tá hann fyri stuttum varð settur sum venjari, og útsøgnin verður eisini undirstrikað av, at hópurin hesa ferð er hin minsti, sum Svimjisambandið hevur sent til oyggjaleikir.
Formligir trupulleikar
Loysunarorðið til trupulleikan við breiddini er fyrst og fremst langtíðar tilrættisleggjan, og tað er so ikki nakað, sum íðkararnir fáa nýtt til serliga nógv á Isle of Man komandi vikuna.
Her ræður um at fremja góð avrik alt fyri eitt, men eisini á hesum økinum hava Føroyar rent seg í ein trupulleika, sum tó er av meira formligum slag.
Tað var nevnliga soleiðis, at freistin fyri tilmeldan til Oyggjaleikirnar var úti 1. mei, og fyri svimjingina var støðan soleiðis, at FM-kappingin ikki var á skránni fyrr enn eina viku eftir hetta.
Tískil var tilmeldanin í stóran mun bygd á gitingar um, hvussu svimjararnir fóru at standa seg, og hóast Svimjisambandið royndi at leingja freistina, so lat hetta seg ikki gera. Tó fingu tey borið so í bandi, at onkrar kappingargreinar kundu skiftast millum svimjarar, sum longu vóru tilmeldaðir, men longri enn hetta slapst ikki.
Fyri úrslitini á Oyggjaleikunum og eisini fyri framtíðar áhugan fyri svimjing má vónin tí verða, at hetta ikki kemur at ávirka avrikini hjá føroysku svimjarunum skeivan vegin. Verða avrikini eins góð, og tey vóru seinast, kann hugsast, at áhugin økist og framtíðin harvið aftur gerst bjartari.
Í kassa fyri seg
Heiðursmerki í Svimjing á Gotlandi ?99
Gull: Eivind Eysturoy 50 m firvald
Dia Jacobsen 50 m firvald
Liðkapping 4X50 m frí
Silvur: Heini Rasmussen 50 m frí
Kristian Martin Joensen 200 m bringu
Kristian Martin Joensen 200 m blandað
Kristian Martin Joensen 400 m blandað
Liðkapping 4X100 m frí
Bronsa: Asbjørn Hansen 50 m bringa
Dia Jacobsen 50 m rygg
Bogi Lenvig 1.500 m frí
Liðkapping 4X100 m frí
Myndir av svimjarum
Kristian Martin Joensen
Dia Jacobsen
Eivind Eysturoy
Asbjørn Hansen
Karin Gaardlykke
Bára Joensen
Shaila Millum Garðarnar
