Sviar eiga flestu av dýrastu krónunum

Seinnapartin í dag verður farið undir endaspurtin í EM kappingini í hondbólti.

Undan fyrru hálvfinaluni fara vertirnir úr Kroatia at siga farvæl í uppgerð um fimta plássið ímóti Tjekkia. Tað verður longu klokkan 14.30.

Fyrra hálvfinalan verður klokkan 17.00. Talan er um grannauppgerð millum Frakland og Spania. Meðan Frakland hevur vunnið gull í EM kappingini tríggjar ferðir – í 2006, 2010 og 2014 – so hevur Spania ongantíð vunnið EM kappingina.

Síðani tað í 1994 varð farið undir EM kappingina, hevur Spania verið fýra ferðir í finaluni, og í øllum fýra førunum eru spaniólar farnir til hús við silvurkrónunum – í 1996, 1998, 2006 og 2016.

Klokkan 19.30 verður seinna hálvfinalan. Tá verður tað grannauppgerð millum Danmark og Svøríki. Svøríki hevur vunnið gull í EM fleiri ferðir enn nakar annar. Sviar hava vunnið finaluna fýra ferðir - í 1994, 1998, 2000 og 2002.

Danmark hevur vunnið EM tvær ferðir – í 2008 og 2012.

Punktum verður sett fyri EM endaspælið sunnudagin. Bronsudysturin verður klokkan 17, og finalan verður klokkan 19.30.