Í Svøríki vísir tann seinasta meiningakanningin, at tað verður eftir øllum at døma stjórnarsamgongan, sum fer at vinna ríkisdagsvalið um eina viku. Eftir kanningini, sum Sifo-stovnurin hevur gjørt fyri Svenska Dagbladet, fær samgongan 51,7 prosent av atkvøðunum, og tann reyðgrøna andstøðan fær 42 prosent.
Tað merkir sambært blaðnum, at 360.000 veljarar skulu broyta hugsan, um samgongustjórnin hjá Fredrik Reinfeldt, forsætisráðharra skal koma í vanda.
Sifo-kanningin vísir eisini, at Moderaterna verður størsti flokkur við 31,4 prosentum av veljarunum. Sosialdemokratarnir fáa 28,7 prosent, sum er góð seks prosentstig minni enn á valinum í 2006.
Tann umstríddi flokkurin Sverigedemokraterna fær sambært teirri seinastu kanningini 4,6 prosent. Við tí úrslitinum sleppur flokkurin inn um tinggáttina, men hann verður ikki tungan á vágskálini, skrivar Svenska Dagbladet.
