Nógv eru tey, ið hava havt heilagu Bíbliuna á lofti, og í egnum rættvísi dømt hini samkyndu til illamann.
Ikki er tað sørt, at vit - sum einans síggja aktuellu lógarbroytingina sum ússaligt mannaverk, og ikki sum eina endurskoðan ella broyting av teirri heilagu skrivtini - at vit hava kent okkum illa farin viðvíkjandi viðurskiftum okkara við Várharra, tá vit taka undir við at verja allar teir minnilutar, sum lívið og søgan hevur lært okkum ofta verða illa viðfarnir.
Allur heimurin - uttan tey umráði, har víttgangandi fundamentalistar hava vald og ávirkan - hevur tikið undir við at verja fólk móti ágangi orsakað av húðarliti, átrúnaðarligari sannføring og kynsligari orientering.
Sjálvsagt eigur Føroya Løgting eisini at gera tað sama!
Tøkk til prestin og fólkafloksmannin
Fyri mín part vil eg takka prestinum Sonju Klein fyri,at hon í greinini »Størstur er kærleikin« staðfestir í skrivt, at vit framhaldandi kunnu kalla okkum krinstin, og sostatt ikki verða send beinleiðis til helvitis, hóast vit fylkjast saman við hesum fólkunum, sum vilja verja eisini samkynda minnilutan!
Í Harrans húsi eru mangir bústaðir, so har verður eisini pláss fyri okkum, sum ikki megna at liva syndafrítt, men hava fyrigevingina og náðina fyri neyðini!
Men nú eg havi pennin í hondini, skal mín tøkk ikki minst fara til løgtingsmannin Poul Michelsen, aftur fyri at hann letur møguleikan opnan, at eisini vit - ið ikki blint fylgja Jenisi av Rana, Óla Breckmann og Billi Justinussen, tá umræður etiskar spurningar - at eisini vit framhaldandi kunnu teljast fólkafloksfólk.
Meðan floksfelagarnir allir undir tingviðgerðini traskaðu eftir teirri rásini, sum teir Jenis og Bill slóðaðu fyri teimum, stóð Poul einsamallur ímóti! Tú vart óførur Poul, og siðiliga og væl grundgav tú fyri tíni støðutakan!
Nógv heldur er tað skyldan hjá einum frælslintum, borgarligum flokki at verja ein minniluta, enn at elta har fanatikarar slóða!
