Í Sveis eru vónirnar stórar, alt er dekkað upp til tað stóra brakið, tá Sveis og Kekkia skulu dystast kl. 17 á Sankt Jakob-Park í Basel. Sveis hevur ikki spælt nakran kappingardyst, síðani 1/8 finaluna ímóti Ukraina í HM í 2006, í Týsklandi. Tá tapti Sveis eftir brotssparkskapping, har allir sveisisku spælarnir brendu. Nú er Sveis á heimavølli, og venjarin, hin 64 ára gamli Jakob Kuhn hevur góðar vónir: ?Undir venjing hava spælarnir víst ídni, vilja og spæligleði. Tað hevur verið ein sonn frøi at hava fyrireikað seg saman við hesum hópinum til EM-endaspælið á heimavølli.? Kuhn vónar, at heimaáskoðarnir kunnu gerast ein veruligur ?12. Maður?, sum fer at muna hjá Sveis. Stórskjúttin hjá Sveis, Alexander Frei er tøkur aftur, og tað styrkir munandi um vónirnar hjá vertslandinum. Í søguligum høpi er Belgia í árinum 2000 tað einasta vertslandið, sum ikki hevur rokkið hálvfinaluni í einum EM-endaspæli. Karel Brückner, venjari hjá Kekkia hevur ikki Tomas Rosicky tøkan, og hevur hildið kortini tætt inn at sær, so menn hava ikki fulla hilling á hvørjir 11 byrja inni hjá Kekkia. Brückner sigur seg arbeiða við ymiskum loysnum. Tó er lítil ivi um, at risin, Jan Koller verður í álopinum. Koller er tann spælarin, sum hevur skorað flest mál fyri Kekkia í søguni.
