Ida, Sveinur og Line eru tey trý, sum koma í X Factor finaluna í Boxen í Herning næsta fríggjakvøld. Tað varð greitt í kvøld, tá hyggjararnir skuldu gera av, hvør av teimum fýra, sum eftir vóru, ikki skuldi sleppa víðari. Valið fall á Morten Benjamin.
Fólkatónleikur og rapp vóru á skránni í hálvfinaluni í X Factor í kvøld. Sveinur fekk nógv rós fyri fyrru framførsluna, tá ið hann sang Little Lion Man hjá Mumford & Sons, meðan dómararnir vóru meira ivasamir um rapp-rockin.
Men tað, sum hevði størsta týdning fyri Svein, var, hvat hyggjararnir søgdu, og teir sendu hann í finaluna í X Factor, sum verður um eina viku.
Morten Benjamin var kortini fegin um, at hann var komin so langt, og helt, at »tað heila hevði verið tað vert«.
