Sveiggini í føroysku byggivinnuni eru munandi ógvusligari enn í øðrum londum. Og tí kunna vit takka politiska valdinum fyri.
Tað heldur Heini Fosaa, stjóri í Havnar Timburhandli:
- Tað líkist púrasta ongum. Politikarar hava í áravís tosað um neyvari stýring av virkseminum, so vit ikki uppliva tey sera ógvusligu sveiggj, sum føroyska byggivinnan má liva við. Men onki er gjørt enn, sigur Heini Fosaa.
Hann peikar á, at øktu almennu inntøkurnar verða brúktar upp í góðum tíðum, heldur enn at tað almenna roynir at halda aftur og spara upp, so eitt sindur er eftir til virksemi í verri tíðum.
Hann hugsar ikki bara um inntøkurnar hjá byggifyritøkunum, men eisini um føroysku handverkararnar, sum ofta mugu fara av landinum fyri at finna arbeiði, tá ið niðurgangstíðir eru í Føroyum:
- Úrslitið er, at vit missa allar teir sera virðismiklu førleikarnar, sum okkara handverkarar hava. Teir koma jú ikki heimaftur beinanvegin, tá ið tíðirnar venda aftur til tað betra. Hetta ger so aftur, at útlendskar fyritøkur og hándverkarar taka ein bróðurpart av arbeiðinum, sigur Heini Fosaa.
- Í staðin fyri at seta ferð á nýtsluna, tá ið skattainntøkurnar fara upp - og harvið eggja til yvirupphiting av búskapinum - so átti politiska valdið at stýrt soleiðis, at færri almennar verkætlanir vóru settar í verk í góðum tíðum. Hetta hevði verið ein fyrimunur fyri føroysku byggivinnuna, handverkararnar og føroyska búskapain, sigur Heini Fosaa.
