Longu frá fyrstu løtu sást, at tað var EB/Streymur, ið vildi meira, tí gestirnir úr KÍ løgdu út við sera verjukendum stíli. Eisini sást mestsum beinanvegin, at teir í EB/Streymi heldur ikki løgdu meira fyri enn neyðugt, tí hetta var ein av teimum meira linligu dystunum við Margáir.
Langt var millum teir heilt stóru málmøguleikarnar, og hóast tíðin arbeiddi ímóti, sá EB/Streymur slett ikki út til at hava skund við at fáa dystin av avgjørdan. Og sjálvt um tað ikki eydnaðist EB/Streymi at fáa hol á fyrr enn ímóti endanum á dystinum, gjørdist talan um ein sannførandi sigur.
Sundalagsmenn kunnu framvegis hótta B36 í kappingini um fremsta sessin í Vodafonedeildini, tí við til roknistykki hoyrir, at EB/Streymur eigur ein dyst á og tí mitt í næstu viku kann hála seg trý stig nærri oddasessinum, verður útsetti dysturin ímóti ÍF vunnin.
Hinvegin er KÍ verri enn so tryggjað í botnstríðnum, har bara trý stig eru til eitt pláss niðan fyri ta illa lýddu strikuna. Um ÍF í kvøld vinnur á NSÍ við Løkin í Runavík, er KÍ bara eitt stig framman fyri 07 Vestur, sum tá dettur niður um strikuna…
Sekund á muni
Tað kom at fáa avgerandi týdning fyri dystin, at KÍ longu í 21. minutti fekk ein spælara útvístan, tí eftir tað gjørdist tað bara ein spurningur um tíð, til EB/Streymur fekk hol á og gjørdi av við særda mótstøðuliðið. Men KÍ til rós, so eydnaðist at halda fast sera leingi, tí fyrsta málið kom ikki fyrr enn í 72. minutti.
Útvísingin var hinvegin so sum so, tí hendingin, ið elvdi til hana, byrjaði við einari hending á hinari hálvuni. Nenad Stankovic var á veg frameftir í høgru síðu, tá hann bleiv steðgaður av Paula G. Hansen hjá EB/Streymi, sum við beinunum fremst vann bóltin frá Nenad, ið bleiv liggjandi eftir. Útsýnið hjá dómaranum var kanska ikki so gott, men linjudómarin átti at havt sæð, hvat hendi.
Hvussu var og ikki, so fór Pauli avstað við bóltinum og send fram ímóti KÍ-brotsteiginum, har Arnbjørn Hansen vann kapprenningina við Sørmund Kalsø, ið gjørdist ov seinur og legði fót fyri Arnbjørn, so hann fór um koll. Aftasti maður og reytt kort, og soleiðis gjørdist tað KÍ, ið fekk revsingina, EB/Streymur kanska skuldi havt fingið nøkur fá sekund frammanundan!
Mótbrekkan hjá KÍ gjørdist tilsvarandi tyngri, men hóast EB/Streymur hevði neyðugu yvirvágina, gekst ikki serliga væl við at skapa avgerandi málkjansirnar, og tí gekk so long tíð, áðrenn dysturin fann eina avgerð.
Málini vóru góð
Leingi er tað, ið væl skal vera, plagar at vera tikið til, og ásannast má, at tað vóru trý góð mál, sum áskoðararnir við Margáir máttu bíða so leingi eftir í gjár.
Tað fyrst kom eitt gott korter fyri tíð og var úrslit av góðum uppspæli. Men tá bólturin kom innfyri, átti KÍ at havt fingið ruddað burtur. Tað eydnaðist ikki, so bólturin hoppaði upp um onkran her og onkran har, áðrenn hann endaði hjá Pæturi Dam Jacobsen, ið líkasum sletti hann út til vinstru, har Hans Pauli Samuelsen við høgru innarsíðu plaseraði bóltin vakurt í málið til 1-0.
Síðani var tað Leif Niclasen, ið átti tørn, tá hann fyrst fekk eina góða sending frá Egili á Bø fram í høgru síðu, har Leif spældi stutt saman við Pæturi, áðrenn hann rak til vinstru, fram við tí nógva av KÍ-verjuni, fyri síðani flatt at smekka bóltin inn um vinstru stong.
Triðja málið kom eftir hornaspark í vinstru síðu, sum Daniel Udsen sendi innfyri. Við fremru stong kom eitt KÍ-høvd á bóltin, sum helt fram til aftaru sting, har Arnbjørn Hansen legði seg niður og hálvavegn saksasparkaði bóltin upp undir nettakið.
Ov lítil ferð á
– Øgiliga lítil ferð var á dystinum, sum heldur ikki var serliga væl spældur, men vit vunnu 3-0, og tað er so altíð nakað. Eg mátti biðja spælararnar hjá mær seta ferðina upp, tí tað gekk eitt sindur ov seint, helt eg. Ikki fyrr enn vit fingu mál, kom ró yvir spælið, samstundis sum klaksvíkingar tóktust upp. Vit høvdu bóltin nógv, men fingu lítið burturúr tað nógva av tíðini.
Soleiðis tekur venjarin hjá EB/Streymi, Heðin Askham, saman um dystin við Margáir, eftir at heimaliðið hevði vunnið 3-0 á KÍ. Serliga hetta við lítlu ferðini argaði venjarin, ið slett ikki var nøgdur við tann partin.
EB/Streymur, sum alsamt meira líkist størsta avbjóðaranum hjá B36, skal sunnudagin í Gundadal at spæla ímóti júst oddaliðnum:
– Vit spæla okkara spæl, og tað vísir seg at ganga fínt, og í teimum trimum dystunum ímóti B36 í ár hava vit vunnið tveir og tapt ein. B36 hevur eitt gott lið, sum spælir góðan og skjóta fótbólt, men vit skulu bara halda fast við okkara spæl, sigur Heðin Askham.
