Svøríkidemokratarnir og reyðgrøni blokkurin kunnu fegnast saman í kvøld, aftaná ein feilur í uppteljingini í valúrslitinum í gjár gav bláa blokkinum ein av tinglimunum, ið Svøríkidemokratarnir áttu. Sostatt er munurin millum bláa blokkin og reyðgrøna blokkin nú tveir tinglimir.
Tað er svenski miðilin Expressen, ið skrivar um feilin í uppteljingini, ið bleiv funnin í dag. Eitt valdømi hevði blandað úrslitini, so at svensku valmyndugleikarnir fingu úrslitið frá lokalvalinum í staðin fyri ríkisdagsvalinum.
- Hetta mistakið ávirkaði tingmannabýtið. Ein tinglimur er nú farin frá Miðflokkinum og til Svøríkidemokratarnar, sigur Lars Aden Lisinski, talsmaður fyri svensku valmyndugleikarnar við Expressen.
Sostatt hevur reyðgrøni blokkurin 144 tinglimir, blái blokkurin hevur 142 tinglimir og Svøríkidemokratarnir hava 63 tinglimir.
