Súsanna Bertholdsen, tingkvinna fyri Javnaðarflokkin, hevur sett landsstýrismanninum í barna- og útbúgvingarmálum, Djóna Nolsøe Joensen, skrivligan fyrispurning, sum er soljóðandi:
Nær verður lógaruppskotið um málskúla fyri føroyskt sum annað mál lagt fram í Løgtinginum?
Hetta er eftir tingskipanini ein sonevndur grein 52a fyrispurningur, og landsstýrismaðurin hevur tíggju dagar at svara.
Í sínum viðmerkingum vísir løgtingskvinnan á, at ein týdningarmikil liður í integratiónspolitikki landsstýrisins er sambært heimasíðu barna- og útbúgvingarmálaráðsins at skipa fyri, at borgarar, sum hava annað mál enn føroyskt sum sítt fyrsta mál, fáa møguleika at ogna sær hollar førleikar at samskifta á føroyskum - at hesir fáa møguleika fyri at ogna sær holla vitan um samfelag og mentan í Føroyum, eins og møguleika at útbúgva seg innan føroysku útbúgvingarskipanina.
- Mett verður, at hetta er umráðandi fyri at tryggja góða integratión, sigur løgtingskvinnan, sum vil hava at vita, nær lógaruppskotið um málskúla fyri føroyskt sum annað mál verður lagt fram í Løgtinginum?
Súsanna Bertholdsen vísir á, at barna- og útbúgvingarmálaráðið hevur gjørt eitt lógaruppskot um málskúla fyri føroyskt sum annað mál. Uppskotið fór til almenna hoyring í 2023, og hoyringarfreistin var 31. oktober 2023.
- Tað eru mong, sum ótolnast eftir at vita, hvussu gongur við lógaruppskotinum, so vit kunnu fáa skipaði undirvísingarviðurskifti kring alt landið á hesum øki, og tí verður hesin spurningur settur, sigur løgtingskvinnan hjá Javnaðarflokkinum í sínum fyrispurningi til Djóna Nolsøe Joensen, landsstýrismann.
