- Tað er í ferð viðat henda júst nú, og vit hava ikki stundir til at bíða longur eftir tekniskum loysnum, sigur Savid Rind á granskingarstøðini, sum NASA hevur í New York.
Savid Rind sigur, at fylgisveinamyndirnar av økinum við Norðpólin vísa, at ein broyting er á veg. Ísøkið er minkað eitt prosent um árið síðani 1980 og hevur ongantíð verið so lítiðsum nú.
Amerikonsku granskararnir siga, at broytingin við Norðpólin kemst uttan iva av tí veksandi hitanum á Jørðini, og teir siga seg vera serliga stúrnar, tí broytingin í Arktis ger, at tað verður uppaftur heitari á Jørðini, og teir tosa tí um eina ónda ringrás.
-Kavi og havísur virka sum endurskyn og senda tí orkuna frá Sólini út aftur í rúmdina. Tá ísurin minkar, verður minni sólorka send útaftur, og tí verður tað heitari á Jørðini, sigur Josefino Comino, sum er granskari hjá NASA.
Í september boðaðu amerikanskir og kanadiskir granskarar frá, at tann størsti jøkulin í Arktis, tann 3000 ára gamli Ward Hunt-jøkulin úti fyri Ellesmere Island í ein útnyrðing úr Grønlandi, er í ferð við at fara í upploysn. Jøkulin er longu farin í tvíningar, og partar av honum eru farnir út í Beaufort-havið norðan fyri kanada og Alaska.
