Høgni Hoydal, landsstýrismaðurin í fiskivinnumálum, hevur í dag sent miðlunum semjuna, sum samgongan er komin til í samband við fiskivinnunýskipanina.
Samgongan hevur arbeitt við hesum síðani tey tóku við politiska valdinum í september í 2015, og nú er semja so funnin, hóast rumbul hevur verið innanhýsis í samgonguni í fleiri førum.
Í farnu viku ljóðaði, at Javnaðarflokkurin ikki stóð samlaður aftanfyri tað, sum lá á borðinum hjá samgonguni, men nú letur til, at samgongan hevur funnið stevið aftur, tó allar súðir ikki eru syftar í málinum fyrr enn uppskotið er endaliga samtykt í løgtinginum.
Árni Gregersen tosaði við Høgna Hoydal í tíðindunum á Rás2 klokkan 15.00. Trýst á pílin undir myndini fyri at hoyra landsstýrismannin greiða frá tí, sum broytt er fiskivinnuuppskotinum.
