Nú er greitt at summarið verður ein tónleikafestival fátækari, men vónin er ikki slept enn, sigur ein av fyriskiparunum.
Ì fjør summar rungaðu tónarnir aftur í Kirkjubø, tá Rói B. Poulsen og Helgi Michelsen stóðu fyri tónleikafestivalinum við Múrin. Visjónin var at hava føroyska mentan í miðdeplinum, so allur matur, undirhald og tónleikur var úr Føroyum.
Men fíggjarliga avlopið varð ikki sum væntað, og fyrireikingin kravdi nógv av teimum báðum fyriskiparunum, sum báðir røkja fult starv við síðuna av.
- Vit løgdu nógva orku í fyrireikingarnar, og tað hevur gingið útyvir yvirskotið. Men vit hava ikki slept vónini um at bjóða fólki á festival í Kirkjubø aftur, sigur Rói B. Poulsen, sum er ein av fyriskiparunum.
Góðar afturmeldingar, men onkrir byrjunarfeilir
Hóast fyriskiparirnir vóru væl nøgdir aftaná festivalin, hava teir valt at onkrar rættingar skulu gerast. Og um orkan skal vera til tað, mugu teir hava betri tíð at fyrireika og gera rættingar.
- Vit fingu góðar afturmeldingar frá gestum, sum ynskja at festivalurin ikki fer í søguna. Men um vit skulu kunna bjóða fólki á festival aftur, skal tað fyrireikast væl. Tí hava vit valt at halda festivalin aftur á sumri í 2017, sigur fyriskiparin.
við Múrin er ein tónleikafestivalur í Kirkjubø, sum fyrstu ferð varð hildin á sumri í 2009 og aðru ferð í fjør summar. Næsti festivalur verður í 2017.
