Meðan restin av landinum stríðist við avbjóðingarnar tey hava av, at fólkatalið veksur við rúkandi ferð, eru tað framvegis tvey øki í landinum, sum standa í stað. Og tey eru tey bæði økini, sum onkuntíð verða kallað Suðurføroyar, nevniliga Sandoy og Suðuroy.
Í Sandoy hevur fólkatalið vaksið eitt vet hetta síðsta árið við tað, at í Sandoy búgva tað nú sjey fólk fleiri enn fyri einum ári síðani, tað er ein vøkstur upp á 0,6 prosent. Nógv verri er statt í Suðuroy, tí har er fólkatalið minkað 42 fólk hetta seinasra ári, tað svarar til eina minking upp á 0,9 prosent.
Hagstovan vísir sostatt á, at Sandoy og Suðuroy hava onki fingið burtur úr fólkavøkstrinum síðstu árini. Tað var veturin 2013 - 14 at gongdin vendi og fólkatalið tók at veksa, og síðani er fólkatalið vaksið hvørt ár.
Vøkstur er í øllum høvuðsøkjum, men tvey av økjunum, Sandoy og Suðuroy, eru rættiliga dragnað afturúr. Verður 2014 brúkt til útgangsstøðið, er fólkatalið vaksið 5 – 8 prosent í øllum høvuðsøkjum, men í Sandoy hevur tað staðið í stað, og í Suðuroy er tað beinleiðis minkað 1,8 prosent. Sostatt er fólkatalið í Suðuroy farið niður um 4.600 fólk, tí nú býr 4.581 fólk í Suðuroy.
Tey plássini, har fólkatalið er minkað mest hetta seinasta árið, eru eisini mest í Suðuroy. Tvøroyri er tað plássið í landinu, har fólkatalið er minkað mest, har er tað nevniliga minkað 26 hetta seinasta árið. Næststørsta minkining í landinum er í Hvalba har fólkatalið er minkað 17 fólk og triðstørsta minkingin er í Vági, har fólkatalið er minkað 13 fólk hetta síðsta árið.
Av útoyggjum er fólkatalið í Nólsoy vaksið trý fólk og í Skúvoy eru tey eitt fólk fleiri enn fyri einum ári síðani. Í Dímun og í Koltri er støðan óbroytt. Í hinum útoyggjunum minkar fólkatalið eisini, og mest minkar tað í Hesti, har tey nú eru fimm fólk færri enn fyri einum ári síðani.
