Maðurin, sum nú verður hildin at vera drápsmaðurin, er ongantíð fyrr drigin upp í tað loyndarfulla morðið. Men í gjár skrivaði Dagens Nyheter, at tað er skjalprógvað, at maðurin var í Stockholm tann 28. februar í 1986, tá Olof Palme varð myrdur.
Upplýsingarnar eru frá handilsmanninum Kent Ajland, sum hevur arbeitt saman við suðurafrikanarum í einari roynd at finna drápsmannin. Sjálvur sigur Kent Ajland, at hann fekk upplýsingar um mannin, tá hann einaferð var á handilsferð í Suðurafrika.
Maðurin, sum sambært Kent Ajland myrdi Palme, býr í dag í einum øðrum landi, og hann varð ikki drigin upp í kanningarnar, tá svensku myndugleikarnir fyri sjey árum síðani kannaðu, at Suðurafrika hevði nakað við Palme-morðið at gera. Hinvegin var tað ikki nakað loyndarmál, at táverandi suðurafrikansku myndugleikarnir mettu Palme sum ein av sínum fíggindum, tí hann hevði gott samband við ta svørtu frælsisrørsluna ANC.
Kent Ajland hevur kunnað svensku løgregluna um tað, sum hann er komin til, og løgreglumaðurin, sum stendur á odda fyri morðkanningunum, hevur verið í Suðurafrika og tosað við mannin, sum greiddi svenska handilsmanninum frá, hvør drápsmaðurin er. Svenski løgregluovastin, Lars Nyhlen, sigur, at løgreglan fær nógvar upplýsingar um Palme-morðið, men hann viðgongur, at tann seinasta upplýsingin er serliga áhugaverd.
