Landsstýrið ætlar at styrkja Fiskiveiðieftirlitið, sum liggur undir Vørn.
Dennis Holm, landsstýrismaður í fiskivinnu-og samferðslumálum, hevur raðfest eftirlit í uppskotinum til fíggjarlóg 2023.
Í uppskotinum er játtanin til Vørn og Fiskiveiðieftirlit hækkað við tveimum miljónum krónum.
Vørn hevur eftirlit við føroyskum og útlendskum fiskiskipum í føroyskum sjógvi og við føroyskum fiskiskipum, sum fiska uttan fyri føroyskan sjógv.
Stovnurin hevur eisini eftirlit við landingum og umskipingum av veiði í føroyskum havnum.
Dennis Holm, landsstýrismaður í fiskivinnu-og samferðslumálum, sigur, at ein størri játtan fer at styrkja um fiskiveiðieftirlitið.
- Hetta fer at geva okkum rúmari møguleikar at brúka eygleiðarar umborð á fiskiskipum, sum royna í føroyskum sjógvi.
Landsstýrismaðurin leggur aftrat, at hetta eisini fer at betra um eftirlitið við umskipingum og landingum í føroyskum havnum.
