Mangur góður maður, sum nú er komin upp í árini, sigur seg við gleði minnast aftur á skúlatíðina á VBV, har Føroya Studenta - og Preliminerskeið byrjaði í 1937. Ikki var so vanligt tá, sum, nú, at søkja sær hægri útbúgving. Men tann 22. juni hittast norðuri á Eiði tey, sum tóku studentsprógv í 1952.
Hyggur ein at hesum flokki, so sæst, at mong av hesum hava verið við til at mynda føroyska samfelagið og samfelagskjakið tey farnu mongu árini. Og summi eru við enn.
- Ja, árgangurin 1952 var kanska ikki so galin, skemtar ein av stigtakarunum til veitsluhaldið tann 22. juni, Tormóður Djurhuus, tá komið verður inn á prátið um tey, sum gingu á VBV.
Minnast aftur á við gleði
Tormóður Djurhuus sigur, at minst verður aftur á tíðina á VBV við gleði, tí næmingar og lærarar vóru nærlagdir.
- Næmingar komu úr øllum landinum. Úr Runavík, Skopun, Vestmanna, Sandavági, Klaksvík, úr Havn og av Skála, Strondum og av Sundi. Og vit vórðu væl saman sjóvaði og hava hitst mangan tey mongu farnu árini, sigur Tormóður Djurhuus.
Og tað er einki at taka seg aftur í, at flokkurin frá 1952 hevur hildið sambandið. Til 20 ára haldið hittist flokkurin við hjúnafeløgum til veitsluhald í Kirkjubø, til 25 ára haldið á Viðareiði, til 40 ára haldið í Bø og nú til 50 ára haldið verður veitslan við hjúnafeløgum á Eiði.
Av teimum 12, ið tóku prógv, eru 11 enn á lívi og Tormóður væntar, at tey øll koma við tann 22. juni. Tá flokkurin fyri stuttum hittist til myndatøku, var eisini ein lærari teirra við, nevniliga Erik Petersen, sum nú er 91 ára gamal. Hann er einasti eftir á lívi av lærarunum á VBV tá. Erik Petersen var eisini lærari, tá Føroya Studenta - og Preliminerskeið byrjaði í 1937.
- Tað bleiv sagt úti á VBV. Bygningurin nevndist so. Tað lá við Skansavegin. Staðið er sprongt burtur nú. Í fríkorterunum, tá tosast ella filosoferast skuldi, so varð spákað um brúnna, ið gekk yvir á Skansan, minnist Tormóður Djurhuus, sum við spenningi og fragd bíðar eftir tí 22.juni, tá hann aftur skal hitta floksfelagarnar frá 1952.
