Tað var Vilhelm Johannesen, sum var landsstýrismaður í valskeiðnum frá 1985-89 sum legði uppskot fram um grunnin, sum fekk langa navnið »Samhaldsfasti Arbeiðsmarknaðareftirlønargrunnurin«.
Grunnrin kom ikki í gongd, serliga tí, at Fólkaflokkurin tók við róðrið í Tinganesi í 1989. Men eftir valið í 1990 skipaðu Javnaðarflokkurin og Fólkaflokkurin eina tvíflokkasamgongu.
Undir samráðingunum fekk ein bólkur uppgávuna at greiða kravið frá Javnaðarflokkinum um Samhaldsfasta. Í bólkinum vóru Marita Petersen og Jóannes Dalsgaard úr Javnaðarflokkinum og Óli Breckmann og John Petersen úr Fólkaflokkinum.
Tað stóð rættiliga fast í samráðingunum, tí serliga Óli Breckmann vildi ikki vita av grunninum, serliga var tað navnið »samhaldsfasti«, sum klingaði í so sosialistiskt í høvdinum hjá Óla Breckmann.
Tá var tað, at Marita Petersen skar ígjøgnum og segði:
– Óli, hvat nú um okur strika navnið »Samhaldsfasti« og bara kalla hann »Arbeiðsmarknaðareftirlønargrunnurin«?
– Ókey, segði Óli Breckmann, og so varð »Samhaldsfasti« veruleiki – hóast Samhaldsfasti er tað einasta av gamla navninum, sum grunnurin ikki eitur...
