Ein 21 ára gomul kvinna og ein 27 ára gamal maður vórðu í Føroya Rætti í ár dømd ávikavist fýra og tríggjar mánaðar fongsul.
Bæði sigldu við Norrönu, tá tey vórðu tikin 30. september. Tá høvdu tey 200 gramm av hassji uppi á sær.
Smuglingin fór fram á tann hátt, at tann 27 ára gamli maðurin keypti hassjið frá fosturpápa sínum, smuglaði tað umborð á Norrönu og læt 21 ára gomlu kvinnuni tað.
Hetta var triðju ferð, at tey bæði royndu at smugla hassj til Føroya.
Kvinnan seldi síðani hassjið í Føroyum fyri alt frá 90 krónum upp í 300 krónur fyri grammið til so nógvar sum 30 ymiskar persónar.
Hetta metti dómarin var skerpandi umstøður.
Hond var løgd á ymiskar lutir so sum pengar hjá manninum og eina hassjpípu hjá kvinnuni.
