Skemtileikurin ber navnið "Mostir Charley", og er um tveir ungar menn, sum skulu fríggja til hvør sína gentu.
- Fyri at tryggja sær, at alt gongur siðiliga fyri seg, avgera teir, at hetta skal henda, tá mostirin, Charley, kemur á vitjan, men uttan hennara vitan.
Soleiðis siga tey á heimasíðuni hjá Sjóvar kommunu í dag, har tey skriva um leikin.
- Men, Mostir Charley er seinkað, og nú eru góð ráð dýr. Tá óvæntaðir gestir eisini koma á gátt, gerst støðan alsamt meira fløkjaslig - við misskiljingum og skemtiligum støðum.
Skemtileikurin er skrivaður av Brandon Thomas í 1892, og hann er umsettur til føroyskt av Andriasi Justesen í 2001. Málburðurin er nútímansgjørdur til høvi.
- Frumframførsla av leikinum verður í annaðkvøld, fríggjakvøldið hin 14. mars, og síðani eru fleiri sýningar settar til sølu næstu dagarnar.
Lagt verður aftrat, at sýningin er slakar tveir tímar við steðgi á umleið 15 minuttir, tá okkurt lætt kann keypast til góman.
- Atgongumerki til skemtileikin kunnu keypast á billett.fo siga tey í Sjóvar kommunu í dag.
