Landsgrannskoðarin átalar, at almennir stovnar ikki skráseta ognir og útbúna, sum stovnarnir eiga, soleiðis, sum teimum er álagt við lóg.
Sambært roknskaparkunngerðini skal yvirlit yvir ognir og útbúnað vera á øllum stovnum. Sambært rundskrivi frá Fíggjarmálaráðnum 1. februar 2001 um roknskaparreglugerðir skulu allir stovnar hava yvirlit yvir innbúgv, maskinur, bøkur og annan virðismiklan útbúnað við støði í roknskaparskjølum, og skulu yvirlitini m. a. fevna um slag, útveganarvirði, livitíð, og hvar ognin er.
– Vit hava fleiri ferðir víst á, at bert fáir stovnar hava dagførd yvirlit. Í sambandi við vitjanir á stovnum í 2013 staðfestu vit aftur, at enn eru fleiri stovnar, sum ikki hava dagførd yvirlit yvir ognir og útbúnað, skrivar landsgrannskoðanin í ársfrágreiðingini.
Víðari verður sagt, at í oktober 2012 kunnaði landsstýrismaðurin í fíggjarmálum um, at framvegis er ætlanin, at Fíggjarmálaráðið saman við Gjaldstovuni skal fremja málrættað átøk fyri at fáa stovnar landsins at hava dagførd ognaryvirlit. Sum liður í hesum er ætlanin at lækka smálutakravið til ognaryvirlit. Stovnarnir skulu hava eitt yvirlit yvir útbúnað o.t., hvørs keypsvirði er minni enn 75.000 krónur. Í yvirlitinum skal eisini vera útbúnaður, sum er á stovninum, men sum onnur enn stovnurin eiga.
Í oktober 2013 hevur landsstýrismaðurin kunnað um, at roknskaparkunngerðin frá 2007 og roknskaparrundskrivið frá 2001 verða eftir ætlan dagførd seinni í ár, og tá verður spurningurin viðgjørdur.
– Landsgrannskoðanin kann bert enn eina ferð staðfesta, at reglurnar um at skráseta ognir og útbúnað, sum komu í gildi í 2001, verða ikki hildnar, og enn eru reglurnar óbroyttar, sigur landsgrannskoðanin.
