Meðan spenningurin um fremstu plássini í bestu og næstbestu føroysku deildini er so gott sum farin, er stórur spenningur hinvegin um fremstu plássini í triðbestu føroysku deildini.
Triðbesta liðið hjá KÍ, sum ikki kann flyta upp, liggur í løtuni á fremsta plássinum í 2.deild. Hini trý feløgini, sum berjast í oddinum, kunnu hinvegin øll flyta upp. Annað liðið hjá HB liggur sum nummar tvey, bert eitt stig aftanfyri KÍ, meðan Giza/Hoyvík og TB liggja ávíkavíst á triðja og fjórða plássi, jøvn í stigum.
Sum støðan er í løtuni, bendir nógv á at næstbesta liðið hjá HB kemur at flyta upp í 1.deild aftur. Teir hava á pappírinum tveir dystir, har teir eru favorittar til báðar dystirnar.
Størri spenningur tykist at vera um hitt uppflytaraplássið. Giza/Hoyvík og TB berjast um tað plássið, og júst tey bæði liðini møtast innanhýsis í vikuskiftinum í einum dysti, sum verður spældur við Stórá í Trongisvági.
Á liðunum hjá bæði Giza/Hoyvík og TB eru eisini leikarar, ið áður hava verið markantir profilar í bestu deildini. Hjá Giza/Hoyvík slepst ikki undan at nevna teir báðar útlendingarnar, Ahmed Keita og Evrard Blé, meðan fyrrverandi liðskiparin á føroyska landsliðnum, Óli Johannesen spælir við TB. Nevnast kann eisini, at Óli Johannesen í teimum 12 dystunum, sum hann hevur leikt í deildini í ár, hevur skotið ikki færri enn 17 mál, sum er 1,42 mál pr dyst.
Í hinum endanum stríðast ÍF, EB/Streymur og B68 um at sleppa undan niðurflyting, meðan triðbesta liðið hjá Víking longu er flutt niður í 3.deild.
Tvey umfør eru eftir at leika í 2.deild.
Stigatalvan í 2.deild sambært faroesoccer.com eftir 16 umfør:
1. KÍ (Triðbesta lið) – 33 stig
2. HB (Annað lið) – 32 stig
3. Giza/Hoyvík – 31 stig
4. TB (Annað lið) – 31 stig
5. B36 (Triðbesta lið) – 24 stig
6. Royn – 20 stig
7. ÍF (Annað lið) – 17 stig
8. EB/Streymur (Annað lið) – 16 stig
9. B68 (Annað lið) – 16 stig
10. Víkingur (Triðbesta lið) – 5 stig
