Tað var ikki hissini lutakast, sum tað var, tá ið lutur fyri løtu síðani varð drigin í Televarpinum um, hvør skal spæla ímóti hvørjum í fyrsta umfari í kappingini um løgmanssteypið.
Í fjør vann Víkingur steypafinaluna ímóti KÍ. Nú skal Víkingur longu í fyrsta umfari spæla á heimavølli ímóti HB, sum eigur ríkari steypasiðvenju enn nakað annað felag.
At tað ikki eydnaðist at vinna steypafinaluna var stórt vónbrot í fjør hjá KÍ. Seinnu árini er KÍ ofta snávað beinanvegin í steypakappingini, og tað verður stór avbjóðing hjá KÍ longu í fyrsta umfari. Mótstøðuliðið verður B36 í Gundadali.
Í steypakappingini lúrir møguleikin støðugt fyri púra óvæntaðum úrsliti. Hóast tað í fleiri dystum sær út til, at talan er um stórar favorittar, so kann ikki útilokast, at talan verður um okkurt óvæntað úrslit.
Víkingur – HB
FC Hoyvík – EB/Streymur
ÍF – 07 Vestur
AB – FC Suðuroy
B36 – KÍ
Skála – B71
TB – B68
NSÍ – MB
