Stjørnan var mest sum einaráðandi í endaspælinum í bestu kvinnudeildini í hondbólti í ár. Tær vunnu allar sínar dystir, og tí vóru tær stórfavorittar at vinna meistaraheitið, tá liðini fóru undir hálvfinalurnar og finaluna.
Í fyrsta finaludystinum fingu tær tó ein ordans hvøkk, tá tær vitjaðu hjá VB í Vági. Her vann VB ein tryggan sigur. Sjálvt um sigurin bert bleiv fýra mál, so førdu tær við átta málum, tá fimm minuttir vóru eftir, so sigurin var ongantíð í vanda.
Nú stendur seinni finaludysturin á skránni í Klaksvík, og so er spurningurin, um vágskvinnur eisini megna at geva Stjørnuni ein hvøkk í KÍ-høllini.
Stjørnan gott heimalið
VB hevur eitt sera gott heimalið, og tær hava eisini havt sera gott tak á Stjørnuni í Vági í ár. Í grundspælinum vann VB tryggan sigur á Stjørnuni, og í endaspælinum taptu tær bert við einum máli í einum dysti, sum kundi farið báðar vegir. Í fyrsta finaludystinum vann VB aftur á Stjørnuni, og hetta vísir, at VB kann steðga Stjørnuni.
Stjørnan er tó eisini eitt sera gott heimalið. Í grundspælinum vunnu tær við átta málum á VB í Klaksvík, meðan dysturin í endaspælinum endaði við einum sjey mála sigri til Stjørnuna. Enn vita vit sjálvandi ikki, hvussu verður við seinna finaludystinum, men ikki er óhugsandi, at Stjørnan fer at vinna henda. Tær hava nevniliga vunnið allar átta dystirnar í Klaksvík hetta kappingarárið. Málmunurin í hesum átta dystunum er pluss 77, so tær hava vunnið við næstan 10 málum hvønn dyst!
Skuldi tað hent, at Stjørnan vinnur dystin á VB leygardagin, so verður ein triði og avgerandi dystur sunnudagin. Hesin skal so eisini spælast í KÍ-høllini í Klaksvík, tí at Stjørnan gjørdist vinnari av endaspælinum, og hetta gevur teimum rætt til tveir heimadystir í finaluni.
