Tað kunnu strandingar gera, um teir vinna sín heimadyst móti Team Klaksvík í dag.
Eingin ivi er um, at strandingar eru risa-favorittar tilat vinna dystin, og tað gongur spakuliga tann vegin, at hondbóltsfepurin veruliga fer at gera um seg á Skála, har tað eru fimm ár síðani, at liðið seinast var partur av FM-finaluni.
Í Vestmanna verður stóri klassikarin millum VÍF og Kyndil. VÍF hevur verið flúgvandi seinastu vikurnar, og við sigri á Kyndli kunnu teir sementera sína finaluluttøku. Kyndil hevur hinvegin sveiggjað nógv í sínum avrikum, og skulu teir halda fast í møguleikanum at trýsta hini oddaliðini, so skal ein sigur fáast til høldar í dag.
Seinasti dysturin er í Havn, har H71 kemur oman at vitja Neistan. Hoyvíkingar hava leingi verið millum liðini, sum hava elt finaluplássið, men tað hevur gingið heldur striltið seinastu vikurnar. Matematiskt er møguleikin tó enn til staðar, men tað krevur, at tvey stig verða vunnin í dag.
Í Vestmanna og í Havn byrja dystirnir klokkan 16.00. Á Skála er fyrsta bríkslið klokkan 16.30.
