Tað gongur øgiliga striltið hjá kvinnunum í EBS/Skála, sum bæði í 2017 og 2018 vann bæði FM og steypakappingina.
Tær taptu stórsteypadystin, og tær hava tapt tvær tær fyrstu ferðirnar í landskappingini.
Í kvøld spældu tær fyri fyrstu ferð í ársins steypakapping, har tær eru í innleiðandi bólkaspæli B saman við HB og ÍF/Víkingi/B68.
EBS/Skála átti heimavøll á Skála ímóti HB, sum fór suðuraftur við 4-1 sigri. Í hálvleikinum var HB frammanfyri 1-0.
Tíggju minuttir undan steðginum setti Rebekka Benbakoura hol á. Tað var 1-0, inntil tað restaðu átjan minuttir. Tá økti Heidi Sevdal um munin til 2-0. Rebekka Benbakoura økti um munin til 3-0, tá ið tað restaðu sjey minuttir.
Ein minutt seinni minkaði Birna Mikkelsen um munin, og í tíðini, sum dómarin legði aftrat, umsetti Ása á Reynatúgvu brotsspark til mál og harvið vann HB 4-1.
Næsti dysturin í hesum bólkinum í steypakappingini verður 22. apríl, tá ið ÍF/Víkingur/B68 eigur heimavøll ímóti EBS/Skála.
HB skal spæla aftur 2. mai, tá ið ÍF/Víkingur/B68 verður gestur í Gundadali.
Tvey av teimum trimum liðunum vinna seg í hálvfinalurnar.
