Tað man helst vera ein dreymur, sum gongur út hjá Barnsley. Eftir at teir leygardagin vunnu 2-1 á sjálvum Anfield, fingu teir enn eitt stórlið at leika ímóti, tá lutakastið í dag lagaði tað so, at teir fáa heimavøll móti Chelsea.
Manchester United, sum leygardagin hølvaði Arsenal av, fær aftur hesaferð heimavøll, nú ímóti Portsmouth. Lutakastið lagaði tað annars soleiðis, at í hvussu er eitt lið úr lægru deildunum verður at finna í semifinalunum, tí Bristol Rovers úr League One tekur á heimavølli móti West Brom úr Championship.
Lutakastið fall annars soleiðis út:
Sheffield United/Middlesbrough v Cardiff
Manchester United v Portsmouth
Bristol Rovers v West Brom
Barnsley v Chelsea
